Thursday, July 1, 2010

അണിഞ്ഞു ഒരുങ്ങിയ ആന വണ്ടി

ആന വണ്ടി എന്ന ഓമനപ്പേരില്‍ അറിയപ്പെട്ടിരുന്ന നമ്മുടെ കെ എസ് ആര്‍ ടി സി ബസുകള്‍ക്ക് വിശ്വസിക്കാനാവാത്ത രൂപമാറ്റം ഇപ്പോള്‍ വന്നു തുടങ്ങിയിരിക്കുന്നു. എല്ലാ ബസുകള്‍ക്കുമല്ല, ചില പ്രത്യേക റൂട്ടിലോടുന്ന ബസുകള്‍ക്കുമാത്രം. അതിനു നല്ലൊരു പേരും ഉണ്ട് . ലോ ഫ്ലോര്‍ ബസുകള്‍. മലയാളത്തില്‍ പറയുകയാണെങ്കില്‍ താഴ്ന്ന നിലയുള്ള ബസുകള്‍. ഇന്നലെ എനിക്കും ആ ബസില്‍ കേറാനുള്ള ഒരു ഭാഗ്യം ഉണ്ടായി. തിരുവനന്തപുരത്ത് ബസ്‌ കാത്തു നില്‍ക്കുമ്പോള്‍ അതാ വരുന്നു ഒരു കിടിലന്‍ വോള്‍വോ വണ്ടി. കണ്ണഞ്ചിപ്പിക്കുന്ന നിറം. സ്വകാര്യ ബസുകളെ തോല്‍പ്പിക്കുന്ന രൂപം. ആലങ്കാരികമായി പറഞ്ഞാല്‍ "ഒടുക്കത്തെ ലുക്ക്‌". കീശ കാലിയാകുമെന്നു കരുതി മാറി നിന്നപ്പോള്‍ എല്ലാവരും അതില്‍ കേറുന്നു. എന്തും വരട്ടെ എന്ന് കരുതി ഞാനും ഓടി കയറി. കയറിയ ഉടനെ കണ്ടക്ടര്‍ ബെല്‍ അടിച്ചു. നമ്മള്‍ കണ്ടു ശീലിച്ച ചരട് കെട്ടി "ണിം" എന്ന ശബ്ദത്തിലുള്ള മണിയടി അല്ല കേട്ടോ. ഉഗ്രന്‍ ഇലക്ട്രോണിക് ബെല്‍. മോഹിപ്പിക്കുന്ന കിളിനാദം എന്നൊക്കെ വേണമെങ്കില്‍ പറയാം. തുടര്‍ന്ന് ബസിന്‍റെ വാതില്‍ താനേ പതിയെ അടഞ്ഞു. വലിച്ചടക്കുമ്പോള്‍ ഞെട്ടിപ്പിക്കുന്ന ശബ്ദമില്ല. തുറക്കാന്‍ പറ്റാത്ത പ്രശ്നമില്ല. എല്ലാം ഓട്ടോമാറ്റിക്. ഉള്ളില്‍ കയറിയപ്പോഴാണ് മനസ്സിലായത്‌, സംഭവം കുളിരുന്നതാണെന്ന്. അതായത് എ സി. ഇരിക്കാന്‍ ഒരു സീറ്റിനു വേണ്ടി എന്‍റെ കണ്ണുകള്‍ പരതി. നോക്കുമ്പോള്‍ ഒരു സൈഡ് സീറ്റു ഒഴിഞ്ഞു കിടക്കുന്നു. അതില്‍ കേറി ഇരുന്നു ഞാന്‍ ആദ്യം എന്നെ ഒന്ന് നുള്ളി നോക്കി. സംഗതി സത്യം തന്നെ. സീറ്റുകള്‍ എല്ലാം കുഷ്യന്‍ ഇട്ടവ. എല്ലാറ്റിനും സീറ്റ്‌ ബെല്‍റ്റ്‌. ചില ഭാഗങ്ങളില്‍ മടക്കി വെച്ചിരിക്കുന്ന കുറച്ചു സീറ്റുകള്‍. ഞാന്‍ ഒന്ന് ചാരിക്കിടന്നു ഒരു വിഹഗ വീക്ഷണം നടത്തി. ലോ ഫ്ലോര്‍ എന്നാണു പേരെങ്കിലും ഉള്ളില്‍ രണ്ടു ഭാഗമാണ്. മുന്‍വശം താഴ്ന്ന ഫ്ലോറും പിന്‍വശം ഉയര്‍ന്ന ഫ്ലോറും. ഗാലറി എന്നും ഈ ഉയര്‍ന്ന ഭാഗത്തെ വിളിക്കാം. മുംബെയില്‍ സിറ്റി ട്രെയിന്‍ സര്‍വീസുകളില്‍ കാണുന്ന പോലെ നില്‍ക്കുന്നവര്‍ക്ക് പിടിച്ചുനില്‍ക്കാനായി നിരനിരയായി തൂങ്ങികിടക്കുന്ന വളയങ്ങള്‍. യാത്രക്കാരില്‍ ഒരു സിഖ് കുടുംബവും ഉണ്ടായിരുന്നു. തലപ്പാവോക്കെ വെച്ച ഒരു സര്‍ദാര്‍ജിയും കൂടെ നല്ല തടിയുള്ള ഒരു വനിതാ സര്‍ദാര്‍ജിയും. നമ്മുടെ രഥത്തിന്റെ രണ്ടു വശങ്ങളിലും ഗ്ലാസ്‌ ആയതുകൊണ്ട് ചുറ്റുപാടുള്ള കാഴ്ചകളൊക്കെ കണ്ടു സുഖമായി യാത്ര ചെയ്യാം. നോക്കുമ്പോള്‍ എതിരെ സമാനമായ ബസുകള്‍ വരുന്നത് കണ്ടു. രണ്ടു ഓട്ടോമാറ്റിക് വാതിലുകള്‍. ഒന്ന് മുന്‍പിലും ഒന്ന് ഏകദേശം മധ്യ ഭാഗത്തും. ഞാന്‍ വീണ്ടും ബസിന്റെ സൌകര്യങ്ങളിലേക്ക് കണ്ണോടിച്ചു. സ്പീകരുകളില്‍ നിന്നും നല്ല മലയാള ഗാനങ്ങള്‍ ഒഴുകി വരുന്നു. ഉള്ളില്‍ നിറങ്ങളുടെ വസന്തം. ഡ്രൈവര്‍ക്ക് കാണാവുന്ന വിധത്തില്‍ ഒരു ഡിജിറ്റല്‍ സ്ക്രീന്‍. ശ്രദ്ധിച്ചപ്പോള്‍ മനസ്സിലായി അതില്‍ ബസിന്റെ പിന്നില്‍ ഘടിപ്പിച്ച ക്യാമറ കൊണ്ടുവരുന്ന ദ്രിശ്യങ്ങലാണ്‌. ഇനി ഡ്രൈവര്‍ക്കോ കണ്ടക്ടര്‍ക്കോ യാത്രക്കാരോട് എന്തെങ്കിലും പറയാനുണ്ടെങ്കില്‍ അതിനുമുണ്ട് ഒരു മൈക്ക്. അത് ഡ്രൈവര്‍ക്ക് അരികില്‍ വെച്ചിരിക്കുന്നു. പിന്നെ പിന്നിലും മുന്‍പിലും വശങ്ങളിലുമൊക്കെ ഡിജിറ്റല്‍ ബോര്‍ഡുകള്‍. ബസ്‌ പോകുന്ന സ്ഥലങ്ങള്‍ മിന്നി മറഞ്ഞുകൊണ്ടിരിക്കുന്നു. സുഖകരമായ ഒരു യാത്ര. അതിനിടക്ക് ഏതോ ഒരു വണ്ടി മുന്നില്‍ ചാടി എന്ന് തോന്നുന്നു. നമ്മുടെ ഡ്രൈവര്‍ ഒരു ചവിട്ട്‌. അതോടൊപ്പം നമ്മുടെ തടിച്ചു പന്ത് പോലെയിരിക്കുന്ന വനിതാ സര്‍ദാര്‍ജി ഉരുണ്ടു പെരണ്ട്‌ താഴെ വീണു. പാവം ആ വയസ്സായ സ്ത്രീയോട് സഹതാപം തോന്നിയെങ്കിലും ഞാന്‍ നമ്മുടെ ആന വണ്ടിയുടെ ബ്രേക്കില്‍ അഭിമാനം കൊണ്ടു. സര്‍ദാരും മറ്റുള്ളവരും ചേര്‍ന്ന് അവരെ എങ്ങനെയൊക്കെയോ പിടിചെഴുന്നെല്‍പ്പിച്ചു. അവര്‍ പഞാബി ഭാഷയില്‍ എന്തൊക്കെയോ പറഞ്ഞു കൊണ്ടിരുന്നു. മിക്കവാറും നമ്മുടെ ബസിനെ പറ്റിയുള്ള തെറിയാകാനാണ് സാധ്യത. പാവം നമ്മുടെ ആന വണ്ടി. നല്ലത് ചെയ്താലും ആള്‍ക്കാര്‍ ദോഷമേ പറയൂ....

4 comments:

  1. പാരഗ്രാഫ് തിരിച്ചെഴുതാമായിരുന്നു

    ReplyDelete
  2. aa sadhanam nammude kochiyilum undu.Great trvel for a low price.

    ReplyDelete
  3. edaa bhayankaraaa...
    congrats...
    really well...ur ability in writing...
    alla...neeyeppolaa Trivandram poyathu.....?

    ReplyDelete
  4. Dear Friends,

    Jyothiraj Vimaanathilonnum poyi kayaraanjathu nammudeyokke bhagyam...!!!!

    ReplyDelete