Wednesday, April 27, 2011

ഇത് ക്രൂരം....!

ഭയാനകം എന്ന് മാത്രമേ ഇതിനെ വിശേഷിപ്പിക്കാനാകൂ... മാധ്യമങ്ങളിലും മറ്റു പല ചിത്രങ്ങളിലും വായിച്ചും കണ്ടും മനസ്സിലായിട്ടുണ്ട്, എന്ടോസല്ഫാന്‍ എന്ന മാരക കീടനാശിനിയുടെ ദൂഷ്യ ഫലങ്ങള്‍... അത് നേരിട്ട് കാണാനുള്ള ദുര്‍വിധി ഉണ്ടായത് ഈ അടുത്ത ദിവസമാണ്... സംസാര ശേഷി നഷ്ടപെട്ട, കാഴ്ച്ചയില്‍ തന്നെ വൈകൃതം തോന്നിക്കുന്ന, ഒരു രൂപം... എന്ടോസല്ഫാന്‍ മൂലമാണ് ഈ ദുരന്തം എന്നറിഞ്ഞപ്പോള്‍ ഒരു നിമിഷം ഹൃദയം നിലച്ചു പോയി... ഈ പാവം മനുഷ്യര്‍ എന്ത് പിഴച്ചു...? ചിലരുടെ കടുംപിടുത്തങ്ങളില്‍ അല്ലെങ്കില്‍ സ്വാര്‍ത്ഥ താല്‍പര്യങ്ങളില്‍ ഇവര്‍ക്കും ഇവരുടെ വരും തലമുറക്കും നഷ്ടപെടുന്നത് സ്വന്തം ജീവിതം തന്നെയാണ്... നമ്മളൊക്കെ എത്ര ഭാഗ്യവാന്മാര്‍..? വരും തലമുറകള്‍ക്ക് കൂടി യാതനകള്‍ കരുതി വെക്കുന്ന ഒരു കീടനാശിനി തന്നെ വേണോ, കേരളത്തിലെ കശുമാവിന്‍ തോപ്പുകളില്‍ തളിക്കുവാന്‍...? മനുഷ്യന്‍ ചൊവ്വ ഗ്രഹത്തില്‍ വരെ ഇറങ്ങാന്‍ പോകുന്നു.... ശാസ്ത്രം ഇത്ര പുരോഗമിച്ചിട്ടും ദൂഷ്യ ഫലങ്ങള്‍ ഒന്നും ഇല്ലാത്ത കീട നശിനികള്‍ ഒന്നും ഇതുവരെ കണ്ടുപിടിച്ചില്ലേ..? ഇല്ലെങ്കില്‍ തന്നെ ആ പ്രദേശത്ത് മുഴുവന്‍ നാശം വിതക്കുന്ന, അനേകം പേരെ രോഗികളാക്കുന്ന, ഈ മരുന്ന് തന്നെ തളിക്കുന്നതെന്തിന്...? ഞാന്‍ താമസിക്കുന്ന സ്ഥലത്തിന്റെ ഏറെ അകലെയല്ലാത്ത ചീമേനി എന്ന സ്ഥലത്ത് പോലും കശുമാവിന്‍ തോട്ടങ്ങളില്‍ ഇപ്പോഴും എന്ടോസല്ഫാന്‍ തളിച്ചുകൊണ്ടിരിക്കുന്നു... അവിടെ നിന്നുള്ള വെള്ളത്തിന്റെ സാമ്പിളുകളില്‍ വരെ ഇതിന്റെ അംശം കണ്ടെത്തിയിരിക്കുന്നു... ഇത് ബാധിക്കുന്നത് മനുഷ്യന്റെ നാഡീ വ്യവസ്ഥയെ ആണത്രേ...! ഇതെല്ലം ആര്‍ക്കു വേണ്ടി..? മനുഷ്യ ജീവനേക്കാള്‍ വലുതാണോ കുറെ കശുമാവിന്‍ പൂക്കള്‍...? ആ പൂക്കള്‍ക്ക് പകരം കരിഞ്ഞു വീഴുന്നത് കുറെ കുഞ്ഞു ജീവനുകളാണ്.... കേരളം ആകെ ഒറ്റക്കെട്ടായി ഇതിനെതിരെ ശബ്ദമുയര്‍ത്തുമ്പോള്‍ എന്തിനു നമ്മുടെ മാതൃരാജ്യം മാത്രം ഇതിനു വേണ്ടി വാദിക്കണം...? ഇതിന്റെ ഉപയോഗം നിരോധിച്ചേ തീരൂ... ഒരു മനസ്സായി, നമ്മുടെ സഹോദരങ്ങള്‍ക്കുവേണ്ടി നമുക്ക് ശബ്ദം ഉയര്‍ത്താം .....